Drejtori i Bankës Botërore, Humberto Lopez, ka deklaruar se Banka Botërore është e angazhuar të shoqërojë Türkiyen në zbatimin e politikave për të ndihmuar në stabilizimin e ekonomisë.
“Përveç programit tonë në vazhdim prej 17 miliardë dollarësh, gjatë tre viteve të ardhshme ne parashikojmë përgatitjen dhe prezantimin e operacioneve të reja në bordin e grupit të Bankës Botërore për 18 miliardë dollarë”, tha Lopez në një intervistë për Anadolu.
Lopez shpjegoi se kjo përfshin huadhënie direkte për qeverinë, si dhe mbështetjen për sektorin privat.
Paketa, theksoi Lopez, me financim total paraprak prej rreth 35 miliardë dollarësh, kur merren parasysh të gjitha instrumentet e financimit, “i përgjigjet angazhimit të fortë të treguar dhe më e rëndësishmja, veprimeve të ndërmarra nga administrata për të rivendosur stabilitetin makroekonomik”.
Duke vlerësuar performancën ekonomike të Türkiyes gjatë dy dekadave të fundit, Lopez theksoi se inflacioni i vazhdueshëm, kursi i mbivlerësuar i këmbimit dhe presionet fiskale që dalin nga nevojat për shpenzime të lidhura me tërmetet shkatërruese të këtij shkurti, e vënë këtë shteg në rrezik.
“Në këtë drejtim, ne besojmë se shtrëngimi i politikës monetare që po zbatohet nga Banka Qendrore, zbutja e rregulloreve deformuese financiare dhe masat e të ardhurave fiskale për të ulur deficitin fiskal që po ndiqet nga Ministria e Financave, janë hapa në drejtimin e duhur”, tha ai.
Komentet e tij erdhën pas zbulimit të djeshëm të programit ekonomik afatmesëm të qeverisë, që synon rritjen mesatare të prodhimit të brendshëm bruto prej 4,5 për qind në vitet 2024-2026, duke iu bashkuar vendeve me të ardhura të larta me një vlerë ekonomike që tejkalon 1.3 trilion dollarë dhe duke përdorur politikat monetare, fiskale dhe të të ardhurave për të eliminuar faktorët strukturorë që çojnë në inflacion të lartë.
