Në Suedi ka nisur ndërtimi i rrugës së parë të përhershme elektrike në botë, e cila do të mbushë bateritë e automjeteve elektrike në lëvizje.
Vendi ka zbatuar më parë katër pilot-projekte, pra ka ndërtuar katër seksione të përkohshme të elektrizuara, duke përfshirë një në qytetin e Lundit.
Teknologjia e mbushjes së baterisë
Megjithatë, ky seksion i ri 21 kilometra i rrugës do të jetë i përhershëm. Ajo rrugë e elektrizuar po ndërtohet nga Trafikverket – Autoriteti Suedez i Transportit, i cili aktualisht është në kërkim të kontraktorëve për projektin.
Trafikverket nuk ka zgjedhur ende teknologjinë e mbushjes së baterive për t’u përdorur në këtë projekt revolucionar, por projektimi dhe ndërtimi i plotë pritet të përfundojë në vitin 2025, pas së cilës rruga do të vihet në funksion së shpejti.
Janë në qarkullim tre opsione për instalimin e “energjisë elektrike” në rrugë: instalimet e sipërme, shinat elektrike tokësore në sipërfaqen e rrugës që transmetojnë energjinë elektrike nëpërmjet një përcjellësi (i ngjashëm me karrocën e tramvajit) të vendosur nën automjet, ose mbështjellje induktive të ngulitura në rrugë që transmetojnë energji elektrike në automjet me valë.
Seksioni i parë që do të elektrizohet është në autostradën E20, e cila shkon nga Stokholmi në verilindje, përmes Goteborgut, në Malmo në jug. Vetë seksioni i elektrizuar shtrihet midis Halsberg dhe Örebro, dhe u zgjodh qëllimisht pasi është një nga korridoret kryesore të trafikut për transportin tregtar të mallrave.
Zgjidhja optimale
Në mars, Universiteti i Teknologjisë Chalmers i Suedisë publikoi një studim që sugjeronte se një kombinim i rrugëve elektrike (në 25 për qind të rrugëve më të ngarkuara kombëtare dhe evropiane) dhe mbushjes në shtëpi i automjeteve elektrike do të ishte zgjidhja optimale për kalimin në automjete elektrike.
Në atë rast, sipas shkencëtarëve, bateritë në automjetet elektrike mund të jenë dukshëm më të vogla.
