Kompania NewCo Ferronikeli ka njoftuar se ka ndaluar përkohësisht prodhimin, për shkak të siç thonë çmimeve të ulëta të nikelit dhe kostove të larta për prodhim.
“Që nga dita e parë e daljes në prodhim, kompania jonë NewCo Ferronikeli po dëmtohet rëndë nga kostot e larta të prodhimit dhe skontimet e larta në tregun e metaleve. Kjo krizë vjen si rezultat i çmimeve të ulëta në tregun botëror të nikelit dhe rrezikut nga një reçesion për mallrat që parashikohet për vitin 2024”, thuhet në njoftimin e tyre.
Sipas tyre, të gjithë këta faktorë, e kanë sjellë kompaninë para një situate ku ata janë detyruar të marrin vendimin për ndërprerjen e përkohshme të prodhimit deri në një njoftim të dytë.
Megjithatë, përkundër krizave të papërballueshme për ta vazhduar procesin e prodhimit, kompania NewCo Ferronikeli thotë se “bashkë me punonjësit e saj do të gjejnë zgjidhje që kjo periudhë e vështirë të mos i dëmtojë 1,000 punonjësit e saj”.
Ndërkohë, gjatë kësaj kohe, NewCo Ferronikeli njofton se do të angazhohet për zhvillimin e projekteve që e ulin koston e prodhimit në fabrikë si dhe do ta rinovojë teknologjinë me qëllim të rritjes së efiçiencës, për të qenë sa më e gatshme për rinisjen e prodhimit në të ardhmen.
“Ne kemi besim të palëkundur te kompania jonë NewCo Ferronikeli, te perspektiva premtuese e nikelit, si dhe jemi të përkushtuar për ta vazhduar prodhimin në momentin që krijohet një klimë më e favorshme për industrinë tonë”, përfundon komunikata.
