Kërkesa për pjesëmarrje në Iniciativën e Investimeve të Ardhshme (FII), një konferencë biznesi në Lindjen e Mesme e njohur si “Davosi në shkretëtirë”, është aq e madhe sa nga të interesuarit po kërkohet të paguajnë paguajnë 15,000 dollarë për të marrë pjesë.
Sipas mediave të huaja, përcjell Telegrafi, bëhet fjalë për një ngjarje që pritet të mbahet në kryeqytetin e Arabisë Saudite, Riad nga 24 deri më 26 tetor.
Atje, qindra folës janë planifikuar të ofrojnë prezantime që synojnë të ndihmojnë delegatët të zhvillojnë “strategji të reja për të kuptuar sfidat dhe mundësitë më të mëdha të epokës së re”, sipas FII.
Ngjarja vjetore është konferenca më e madhe e investimeve dhe e biznesit në Lindjen e Mesme dhe është krahasuar me Davosin – vendpushimin zviceran të skive që pret Forumin Ekonomik Botëror çdo janar.
Ajo çfarë bie në sy është një ndryshim i dukshëm nga vetëm pesë vjet më parë, kur shumë drejtues perëndimorë e shmangën ngjarjen pas vrasjes së gazetarit saudit Jamal Khashoggi në konsullatën e Arabisë Saudite në Stamboll.
Dhe ndërsa pretendimet për abuzime të të drejtave të njeriut në rajon vazhdojnë, interesi për konferencën sugjeron se shumë janë të përgatitur t’i anashkalojnë ato, shkruajnë mediat e huaja, përcjell Telegrafi. Përveçse është një forum diskutimi, ngjarja është gjithashtu një përshpejtues për mundësitë e investimeve saudite.
Në konferencën e vitit të kaluar, u nënshkruan më shumë se 28 marrëveshje investimesh me vlerë mbi 9 miliardë dollarë, sipas Këshillit të Biznesit SHBA-Saudi.
Ngjarja nxit gjithashtu planet ambicioze të Arabisë Saudite për të diversifikuar ekonominë e saj dhe për të forcuar vendin në përputhje me “Vizionin 2030” të Princit të Kurorës Mohammed bin Salman.
Strategjia e tij ka bërë që mbretëria të investojë miliarda në sport, argëtim dhe teknologji. Ndërsa FII nuk tërheq ende të njëjtën vëmendje të samitit të Davos, kërkesa për ngjarjen e këtij viti nënvizon interesin global në rritje për Arabinë Saudite.
