Banorëve të Seine-Port, një qytet francez afër Parisit, kohët e fundit u është kërkuar të votojnë në një referendum për përdorimin e celularëve në hapësirat publike. Me 146 vota kundër 126, rezultati mbeti i pasigurt deri në fund, por banorët vendas kanë vendosur, celularët nuk do të lejohen më në ambiente publike. Në këmbim, kryebashkiaku do të krijojë një qendër sportive, një kinema për fëmijë dhe adoleshentë.
Me 272 votues dhe rreth 2000 banorë, shkalla e pjesëmarrjes në referendum sigurisht që mund të vihet në dyshim. Megjithatë, ata që u kujdesën të shprehnin mendimin e tyre, kanë vendosur që hapësira publike e Seine-Port do të duket shumë ndryshe në të ardhmen.
“Prisja më shumë ndryshim. Është kaq ndërhyrëse. Njerëzit kanë përshtypjen se ne po ndërhyjmë në jetën e tyre. Nuk e dua këtë! Por është e qartë se ekziston një problem i shëndetit publik. Ne duhet t’i ndihmojmë ata”, komentoi pas votimit kryebashkiaku Vincent Paul-Petit.
Sapo kryetari të miratojë dekretin, përdorimi i celularëve në qytet do të ndalohet para shkollave, dyqaneve, gjatë ecjes në rrugë ose kur ka shumë njerëz të pranishëm në një hapësirë publike ose shoqëruese. Për më tepër, dekreti u kërkon prindërve të ndalojnë të gjitha llojet e ekraneve në mëngjes, në tavolinë, në mbrëmje apo në dhomën e fëmijës së tyre. Megjithatë, pavarësisht nga të gjitha qëllimet e mira, asnjë sanksion aktual nuk do të vendoset për të mbështetur dekretin, duke e bërë atë në thelb një gjest simbolik.
“E shoh dëmin që u bën të vegjëlve që në moshën tre vjeçare. Disa nuk janë në gjendje të përdorin as gishtat e tyre, të grumbullojnë kube, të ulin pantallonat për të shkuar në tualet. Ata nuk mund të thonë ‘urra’, por mund të thonë ‘tv’! E gjithë kjo është për shkak të prindërve. Vendoseni përpara një ekrani, fëmijët janë të qetë. Por asgjë nuk ndërtohet brenda trurit të tyre”, tha për gazetën “Le Parisien” drejtoresha e kopshtit lokal Jeanne.
Përpara se dekreti të ketë hyrë në fuqi, votimi tashmë ndan opinionet në Seine-Port. Nga njëra anë, shumë banorë të rinj i referohen faktit se në qytet ka pak për të bërë, ndërsa disa banorë theksojnë se kryetari i bashkisë nuk mund të vendosë juridikisht masën. Nga ana tjetër, disa pajtohen se përdorimi i smartfonëve është bërë shumë i shpeshtë dhe që ka ndryshuar jetën, si për fëmijët ashtu edhe për të rriturit, dhe shpresojnë se dekreti, megjithëse simbolik, do t’u hapë sytë njerëzve ndaj problemit.
/Motilokal.com
