Banka Qendrore Evropiane ka rritur sërish normën e interesit me 25 pikë përqindje pra në 4 për qind, që është niveli më i lartë që nga fillimi i monedhës euro në 1999.
Sipas BQE-së, edhe pse inflacioni vazhdon të bie, ky vazhdon të mbetet shumë i lartë për një kohë të gjatë.
“Inflacioni vazhdon të bjerë, por ende pritet të mbetet shumë i lartë për një kohë të gjatë. Këshilli Drejtues është i vendosur të sigurojë që inflacioni të kthehet në objektivin e tij afatmesëm prej 2 për qind në kohën e duhur. Për të përforcuar progresin drejt objektivit të tij, Këshilli Drejtues vendosi sot të rrisë tre normat kryesore të interesit të BQE-së me 25 pikë bazë”, thekson BQE-ja.
Institucioni në i lartë financiar i BE-së, la të kuptohet se mund të mos ketë më nevojë të rrisë më tej normat, megjithëse tha se mbetet e varur nga të dhënat.
“Normat kryesore të interesit të BQE-së kanë arritur nivele që, të mbajtura për një kohëzgjatje mjaft të gjatë, do të japin një kontribut të konsiderueshëm në kthimin në kohë të inflacionit në objektiv. Këshilli Drejtues do të vazhdojë të ndjekë një qasje të varur nga të dhënat për të përcaktuar nivelin e duhur dhe kohëzgjatjen e kufizimit”, thuhet në vendim.
Eurozona në tërësi e ka shmangur recesionin deri më tani, por Gjermania, ekonomia më e madhe e saj ka pësuar tkurrje. Nuk janë vetëm normat më të larta të interesit që po rëndojnë aktivitetin ekonomik. Një tjetër faktor ishte edhe frika nga mungesa e gazit natyror pas pushtimit rus të Ukrainës vitin e kaluar. Po kështu është edhe dobësia në Kinë, ku mbështetet shumë industria prodhuese e Gjermanisë.
Në të njëjtën kohë, norma e inflacionit në Eurozonë qëndron në 5.3 për qind, ende shumë larg mbi objektivin prej 2 për qind të BQE-së. Edhe pse ka renë nga kulmi prej 10.6 për qind në tetor, parashikohet të vijojë në këto nivele për disa kohë.
Komisioni Evropian në fillim të kësaj jave uli parashikimet për zgjerimin ekonomik dhe tha se inflacioni do të vazhdojë të jetë mesatarisht më shumë se 3 për qind në vitin 2024.
