Problemi i biçikletave me bateri, është se prodhimi i baterive konsumon shumë burime natyrore si litium ose elementë të tokës së rrallë, të cilët kërkojnë procedura të gjera dhe shpesh me ndikim në mjedis. Megjithatë, sipërmarrësi francez Adrien Lelièvre ka krijuar një zgjidhje të qëndrueshme. Ai projektoi dhe patentoi një biçikletë elektronike të quajtur Pi-Pop, e cila nuk përdor bateri litiumi, por superkondensatorë.
“Sistemi mbushet kur udhëtimi është i lehtë dhe kur biçikleta frenon falë frenimit të motorit, energjia kthehet kur nevojitet”, tha Lelièvre, drejtori i STEE, kompania pas kësaj biçiklete. Një superkondensator funksionon duke grumbulluar energji në një mënyrë elektrostatike, ose me anë të një ngarkese që lëviz ngadalë. Në rastin e biçikletës, do të thotë të grumbullohet energjia kur personi pedalon ose frenon dhe ta përdorë atë për të ndihmuar në veprime më të vështira si rinisja ose ngasja përpjetë.
Në prodhimin e biçikletës nuk përdoren materiale tokësore të rralla, pasi superkondensatorët janë bërë nga karboni, polimer përçues, fletë alumini dhe pulpë, materiale për të cilat tashmë ekzistojnë procese riciklimi. Po ashtu nuk ka nevojë të presësh që biçikleta të mbushet.
Kompania gjithashtu pretendon se jetëgjatësia e superkondensatorit varion nga 10 deri në 15 vjet krahasuar me pesë ose gjashtë vite për një bateri litium. Aktualisht, Pi-Pop prodhon 100 biçikleta në muaj. Në të ardhmen, kompania synon të prodhojë 1000 biçikleta në muaj deri në vitin 2024.
